Rundunar ’yan sandan jihar Kano ta samu nasarar ceto shugaban jam’iyyar APC na ƙaramar hukumar Rogo, Abdullahi Alasan Beli, wanda aka fi sani da Abdullahi Fanka, bayan shafe kwanaki 68 a hannun masu garkuwa da mutane.
Kwamishinan ’yan sandan jihar Kano, CP Adamu Bakori, ne ya sanar da nasarar ceton yayin ganawarsa da Gwamna Abba Kabir Yusuf a gidan gwamnatin Kano.
Nigerian Post ta bibiyi cewa, a cewar rahoton, wasu ’yan bindiga ne suka yi garkuwa da Beli daga gidansa da ke garin Beli, a ƙaramar hukumar Rogo, inda suka riƙa sauya masa wurin tsarewa a wasu sassan Kano da jihohin da ke makwabtaka da ita.
Da yake bayyana halin da ya shiga bayan kuɓutarsa, Beli ya ce masu garkuwar sun riƙa kai shi Danja, Ikara da Giwa a jihar Kaduna, da kuma wasu sassan jihar Zamfara.
CP Bakori ya bayyana cewa an samu nasarar cetonsa ne sakamakon haɗin gwiwar jami’an tsaro da kuma amfani da dabarun gudanar da samame.
Bayan samun labarin, Gwamna Abba Kabir Yusuf ya yaba wa kwamishinan ’yan sandan da sauran jami’an da suka taka rawa wajen kuɓutar da shugaban jam’iyyar.
Gwamnan ya kuma yaba da gudunmawar jami’an sashen yaƙi da garkuwa da mutane, CSP Aliyu Muhammad Auwal da CSP Ado Muhammad Audi, tare da kakakin rundunar ’yan sandan jihar, CSP Abdullahi Kiyawa.
Haka kuma, gwamnan ya umarci kwamishinan lafiya na jihar da ya tabbatar an ba Beli cikakkiyar kulawar lafiya da taimakon farfaɗo da lafiyar kwakwalwa bayan halin da ya shiga, inda gwamnatin jihar za ta ɗauki nauyin dukkan kuɗaɗen jinyarsa.
Ya sake jaddada aniyar gwamnatinsa na tallafa wa jami’an tsaro domin kare rayuka da dukiyoyin al’ummar jihar Kano.
