Tsohon dan majalisar dattawa mai wakiltar mazabar Kaduna ta Tsakiya a Majalisar Dattawa ta 8, Shehu Sani, ya karyata zargin da tsohon gwamnan Jihar Kaduna, Nasir El-Rufai, ya yi na cewa tsohon shugaban jam’iyyar APC na kasa, Abdullahi Umar Ganduje, na da hannu a sace dan gwagwarmayar siyasa, Abubakar Idris, wanda aka fi sani da Dadiyata.
Shehu Sani ya bayyana cewa wannan zargi ba shi da tushe balle makama, yana mai jaddada cewa babu wata hujja sahihiya da ke nuna cewa Ganduje yana da hannu a lamarin.
Ya bayyana hakan a shafin sa na X inda ya gargadi ‘yan siyasa da su guji yin zarge-zarge maras dalili, yana mai cewa irin hakan na iya tayar da hankalin jama’a da kara dagula al’amuran siyasa.
Tsohon sanatan ya kara da cewa batun bacewar Dadiyata ya kamata hukumomin tsaro su binciki lamarin ta hanyoyin doka, maimakon jefa shi cikin rigingimun siyasa.
Bacewar Dadiyata, wanda ya shahara wajen sukar gwamnati, har yanzu ba a warware ta ba, duk da kiraye-kiraye daga kungiyoyin kare hakkin dan Adam da na farar hula da ke bukatar gwamnati ta kara kaimi wajen gano inda yake.
Har zuwa yanzu, babu wani rahoto na hukuma da ya bayyana a fili wadanda ke da alhakin bacewar sa, duk da ci gaba da muhawara da ce-ce-ku-ce a bainar jama’a.
Ganduje Ba Shi da Alhakin Sace Dadiyata – Shehu Sani
