Sheikh Yakubu Musa Katsina ya bayyana takaicin sa akan irin yadda musamman ‘yan arewa suka kasa cim amfanin gwamnatin shugaba Bola Tinubu.
A cewar shehin malamin shugaba Bola Tinubu ya cuce su musamman yadda baya sauraran koken ‘yan arewa a cikin sha’anin mulkin sa kamar yadda yake sauraren ‘yan kuɗi
A wani rahoto da Popular News ta wallafa, Sheikh Yakubu Musa ya ce yana magana ne a madadin kungiyar izala tunda kowa ya san matsayin sa a cikin ta.
Waɗanda kalaman dai suna zuwa ne a daidai lokacin da shehin malamin ke gudanar da karatun tafsirin Alqur’ani na watan azumi.
Ya kuma cigaba da bayanin cewa idan har shugaban ƙasa bai canza kudurin sa ba na ƙakabawa talakawa haraji ba, lallai zai gani a kwaryar zaɓen shi.
Sheikh Yakubu Musa ya ce Allah ya yi wa Nijeriya arziki amma gwamnati ta yi amfani da shi akan ‘yan ƙasa maimakon haka sai ta bijiro da batun haraji ga talakawa
Ya ce akwai takaici kwarai da gaske irin yadda shugaban ƙasa ke bin talakawa da ke neman abincin da za su ci, ana karbar haraji.
