Anambra, 16 ga Agusta 2025 – Hukumar Zaɓe Mai Zaman Kanta ta Ƙasa (INEC) ta tabbatar da cewa tana ci gaba da tattara sakamakon zaɓen rikon kwarya da aka gudanar a Onitsha North I (Majalisar Dokokin Jiha) da kuma Anambra South (Majalisar Dattawa).
A cewar rahotannin da muka tattara daga IReV, sakamakon rumfuna na ci gaba da shigowa, inda aka samu 47 daga cikin 166 rumfuna a lokacin wannan rahoto. INEC dai ba ta ayyana wanda ya yi nasara ba tukuna.
Sai dai rahotanni daga kafafen yaɗa labarai sun tabbatar da cewa jam’iyyu irin su APGA, LP, APC da ADC ne suka fafata a zaɓen Onitsha North I, inda ake ganin karon farko jam’iyyar ADC ta samu damar shiga gaba a fafatawa da manyan jam’iyyun.
Wani abu da aka lura shi ne ƙarancin fitowar masu kada ƙuri’a da kuma tsauraran matakan tsaro da aka ɗauka domin tabbatar da zaman lafiya yayin gudanar da zaɓen.
A yanzu haka, duk wani da’awar nasara da ake yadawa a dandalin sada zumunta bai da tushe, domin INEC ita ce kaɗai hukumar da ke da ikon ayyana wanda ya lashe zaɓe.
Mai magana da yawun INEC a jihar, ya tabbatar da cewa hukumar za ta sanar da sakamakon karshe da zarar an kammala tattara bayanai daga dukkanin rumfunan da aka gudanar da zaɓe.
